يا قمر..(شعر شعبي عراقي) (منقول)

[احمد حمادة]

يا قمر..(شعر شعبي عراقي)


بهيده على بختك يا كمر .. مساهر واريد اشكيلك

انه غريب ابدنيتي .. مضيّع وادور ابليلك

عن ربعة اهلي ، ودلّة الديوان ، ومواويلك

عن ضحكة البربين لعيون الدلو

عن رقصة الصفصاف والماي الحلو

عن صحبتي، وخلاني , وعيون النهر

بهيده على بختك يا كمر

***

يا غربتي ...

غربة عصافير التودع اعشوشها... برفّة جنح

ويا دمعتي ...

دمعة الكاع التبكي موت اهروشها... بجيت الملح

يا دار اهلنا الطاهره ... مر العمر

عيون اليحب امساهره ...ومامش خبر

بهيده على بختك يا كمر

***

وك يا كمرنه مروتك ... حنّي الشواطي بدمعتي

كلهم كبرت اعله الصبر...والونّه صارت غنوتي

مشتاق ابوسن دجله... واشرب مايها

واعزف ترانيم المحبّه بنايها

دجله الهوى ، والسوق ، والحب ، والسهر

بهيده على بختك يا كمر


شعر : خالد العامري

[لــؤلــؤة بــغــداد]

مشكـــــــــــــــــــــــــــــــور على النقل المميز

[شيرين البغدادية]

الله الله شنو هل الكلمات الرائعة النابعة من القلب وعذب الكلام يسلمو على الموضوع
تقبلو تحياتي الكم
شيــــــــــــــــــــرين

[الفنكوش الاسود]

شكرا أخوية أحمد