الجوله الثالثه .. مسابقة اجمل قصيده وطنيه

[انمار علي الدليمي]

http://www.arabsys.net/pic/bsm/11.gif (http://www.arabsys.net/pic/index.php)

مرحبا :s(23):
نجاح بعد نجاح .. بتوفيق من الله سبحانه وتعالى وجهود الطيبين ممن شاركوا وصوتوا وساعدوا في انجاح هذه المسابقه الوطنيه اختتمت الجوله الثانيه وانطلقت الجوله الثالثه منها ..

هذه الجوله تختلف قليلا عن مثيلاتها الي سبقنهه .. من حيث طريقة المشاركه وتعدد الجوائز .. حيث ستكون المشاركه داخل هذا الموضوع .. يعني الي يحب يشارك وينزل قصيده رح ينزلهه هنا ولا تقبل الردود هنا نهائيا سوى القصائد المشاركه بالمسابقه .ويتم مشاهدتها من قبل الاعضاء عند نهاية الموعد المحدد لتنزيل القصائد ويتم التصويت عليها بموضوع مستقل عن هذا الموضوع ..

اما قضية الجوائز ..بالاضافه الى وضع وسام الفوز تحت اسم الشاعر الي يفوز بالمسابقه والي مكتوب بي (الفائز بمسابقة القصيده الوطنيه) .. بالاضافه الى تثبيت القصيده لمدة شهر من تاريخ انطلاق الجوله ..تم اضافة ما يلي..

اضافة وسام فوز آخر وهو وسام القصيده الفائزه يوضع تحت القصيده او اعلاها وليس تحت اسم العضو .. وهذا هو الوسام للقصيده الي فازت بالجوله الثانيه كمثال..
http://www.iraqup.com/uploads/bPb1B-86Kj42445.jpg (http://www.iraqup.com/viewer.php?id=bPb1B-86Kj42445.jpg)


اضافة الى ماسبق اتفقنا اني واوراس على انه الشاعر الي يفوز يسجل القصيده بصوته ويتم تنزيلهه بالموقع بأسمه وصوته وبالمنتدى ايضا .

رجاءا رجاءا رجاءا الالتزام بقضية الامانه الادبيه للقصيده والشاعر .. لأن الكل شاف شلون صارت اختراقات بالجولات السابقه وكثير من القصائد نسبت لأعضاء ليسوا اصحابها .. رجاءا هذه المسابقه فقط لمن يكتب بقلمهه مع احترامنا للجميع .

القصائد المشاركه بهذه الجوله تكون هنا حصرا .. يعني الي يحب يشارك ينزل قصيدته هنا كرد على هذا الموضوع ...
شكرا للجميع

دمتم .. انمار الدليمي

[زياد البصراوي]

صفت لأهل الكراسي

صبرآ يا وطـن بس صبرك ليا وين .؟
كافي تگول باچـر محد بحالـــك..

گوم انتَ عله حيلك وأذبـح الجـلاد
عشرينــك بعدهه تحشم بفالك ..

مثل ميمون اشوفك مارضه عله الصار
أركـض وأنتــفض بـــس وينــه خيآلــك ..!

شلون لهسه ساكت وأنتَ أبن شعـلان
وكــل عشرة بگبر متوسدة اطــفالك ..؟

شلـون انطاك گلّبك نبقـى مذبوحين
مضيفك سده كافــي وكَسر دلالك ..

صفت لأهل الكراسي وكلهه تآكل بيك
وانتَ( أيـوب )بعــدك ساكت شمالـك ..؟

ناس تبيع بيـك ونآس بيك تبيـع
وجوعان الشــعب وميتمّـة عيالـك ..

اهلك بايعينك لليــصّح شـرآي
والف شرآي واگــف يآكل بجالك ..


حزنانـه الشـوآرع والطريق طويـل
ومتيّه وطنــه ويـــــاهو ليطلعـه ...؟

خمستالاف حاكم وآنه دمي يسيـل
وبكــل بيت ميت .. كل فرع قطعـه ..

أبنك. يكتل ابنك أدري ترهم ويـن .؟
غدر وبظهـر اخوكـ الخنجر تزرعـه ...

بعده الوضع نفسه وباقي نفس الحال
نفسه الرآح اجانـه وضربه في تسعـه ...!!!




مَودتـي وحُبـي
:s(23):/// زيــاد ألبــصّـرآوي ///:s(23):

[عمر أبو فله]

هذا حالك ياوطن



يگولون ألقوي للزمان يلين..... وألقوي تكثر سچاچينه أذا طاح


هذا حالك ياوطن .صندوق انته من ذهب. بس ياوسفه عد من صاير المفتاح.


حبيبي ياعراق وأبد ماكو بغلاتك .ترضوهه خمس سنين صارله مامرتاح .


أشو غفله ألحزن دگ بابه عالروح. وسوالف ألقتل والانفجارات من المسا حتى ألصباح.


على ضلوعي ألهمر تمشي.. .وينفطر گلبي من يعبر غريب وشايل سلاح.


خربت هالنفوس وعالوضع سيطر ألدولار ..عشر ورقات لليكتل أخوه ويشتغل ذباح.


هذا حالك ياوطن .سوالف بيك ماانزل الله بها من سلطان .فرق موت . ميليشيات...


نصاب قانوني .احزاب .فيدراليه .ماده ميه وأربعين ....وألثكالى مابطلت نياح.


ذهب الامان في حين غره .وياجلسه ويانصاب يرجعلنه الامان بعد ماراح .


لكن لابد يوم تصفه وهالغمه عنه أتروح ..ويخلي ألسني وألشيعي ألراح بالراح .


وهذا حالك ياوطن



أخــوكم عـمــر أبو فـلـــه

[نور البدر]

طبعاً هاي القصيده منشوره سابقاً بس حبيت اشارك فيها في مسابقة القصيده الوطنيه
ويارب أنشاء الله تعجبكم


صوت الدمع
أريد أبجي واسمعك صوت الدموع
وخل يحجي الدمع ويسولف أشماله

تدري شكد معاني تشيل العيون
بس يوكع دمع تتوضح الحاله

وأضن صوت الدمع بيه وحده من أثنين
لو فاكد عزيز ويذكر أطلاله

ولو مزنه فرح وتخيل أنت الصار
يعني أثنين هنه العين هماله

أنه بعيني حزن والفرح ماموجود
دورته شكثر ولكيته رحاله

وخل يحجي الدمع خل نفتهم شيكول
مو هي السوالف حيل جتاله

عشرين العراق اصبحت بس تذكار
والمكوار ظل يتنخه بالفاله

ناس تكول شعلانك عراق بظلمة النسيان
نام بحسرته وماهمته أعياله

لأن شاف الوطن منهوب من كل صوب
ونباكت ثمرته وظلت أسلاله

وعنكود العنب ظل عل الغصن مجروح
ينشد عل السلال وياهو حماله

وبستان العمر بيه اشكثر ألوان
بس لون الورد معروفه اشكاله

بس ندري الوكت ليل ومتاع بعيد
ومزنه صيف مرت بينه حياله

خذت منه الفرح وأمسى الحزن مهيوب
باجر بس نعيد نكطع أغلاله

وناس شكد حجت كالت عليه أنباع
موطنه وصبح للأجنبي جماله

أصرخ وبعلاة الصوت ماينباع
عراق حسين هذا وبيه خياله

[سـفـيـر ـالأحـزـآن]

سالوني علــــيك وجاوبــــــتهم بـــيـــك ما يحتاج اجــــــــــــاوب وانت كـــــدامـــــــــــي
وصــــــار الكلب ورقه والنبـــض اقــــلام وقعت بـــــــــــضميري ونشفت اقلامــــــــــي
اذا كصو ابهــــامي الجــــنت ابصـــم بي حــــبا بالعـــراق يخــــــــضـــر ابــهاــــــــــمي
واذا حبـــك اعدامي انه احبـــك مــــوت والله انــــــولد في لحـــضة اعــــدامـــــــــــي
مـــا مــــيت كبــــل لتعــــد وراي ايـــام بس ماتت حــــرب وامجلـــبه بأيامــــــــــــــي
كحلت الشمس من دم ضحايا الـــفـــاو ونهر جاسم غرك بس شــــــالته ابلامـــــــي
شهر رمضان اجه وطب وطــــلع واعـــاد وانا اتسـحر بصــــــــومي وافطر صيامـــــــي
ماشدن احزامي اتعلم مــــن انـــخـــاه يشد روحه علي لوحــــــــده احزامـــــــــــي
في حرب وسلم فوك الخصر مشـــدود اكل لحم الخــــــصر وتعــــــنه لعضامــــــــي
اندل الالم بــــــس النزيــــــــــــف يتيه وياخذني النــــــــزيف ويـــــتيه آلامــــــــــي
من شفت السهم ما وصل كلبي وطاح صرت كلي صدر اركــــــــض اعلى سهامـي
واحد من احبه او واحــــــد المحـــــبوب واحد بالقصيـــــده واحد ابــــــهامــــــــــــي
واحد كل عمرنه او واحد المعـــــــــبود وهم واحد الموت او واحـــــد اســــــــلامي
واحد من نطيح او واحد من انــــــــكوم ولو واحد بواحــــــد جـــدول ارقــــامــــــــي
مستوره الخيم وانه بحلاة النـــــــــــوم قميصي اعلى الشرك ضل يحرس اخيامـي
بس رادوني ابوس ايد الضلم مذلـــــول بست ايد الضلم بس بحلك صمصــــــــامـي
ما رمشت اعيوني بالقصف من صــــار رمش كل القصف من سحبت اقســـــــامي



سفير الاحزان

[ابوعبدالقادر]

الروح رادت وطن ..منهو الي ينطيها
مامعلمه عالغرب..بالخير بانيها
مجروحة هدها التعب ..منهو اليداويها
وعيوني ياما بچن
ودموعي كلهن صفن
والروح رادت وطن..منهو الي ينطيها
فديوم چان الها وطن واسمه يهز جبال
فارس على مهرته يرد العدو لو عال
عالي على كل من علامحروس باسم العال
يسكت كبار الحلگ لو بس حچى ولو گال
تشهد مأثر اله وتشهد اله ذي قار
اتهابه كل العجم ازغارها وكبار
وشعلان يشهد اله وتشهدله الثوار
مشهودلك ياموطني يامعقل الاحرار
تاريخ ما ينمسح اشمارادوا يمسحوه
نور وسطع عالبشر ما ضنتي يطفوه
الردناه احنه وطن شنهو الي يريدوه
التاريخ علا وعلا و فنهم يلحگوه
اعداء صاروا اله ولكل نجاح اعداء
ما رادو يصير الوطن يرد العدو لو ساء
رادونا نخضع نذل من زاخو للفيحاء
وحقنوك يا موطني بالعن واصعب داء
بداء الفتن يا وطن وبهاي گدرولك
ولمن سرى بيك المرض اچفان گدرولك
لكل طائفة حصة چفن وگبور حفرولك
ما ضل بعد كل شي انتهى حت قطعة كتبولك
خلصنا ما ظل حچي والحاضر انشوفه
الناس برى صفت للغربة ملهوفة
تلهث باسم الوطن وما تگدر اتشوفه
وترسمله صورة حلم واتغازل اطيوفه
وتركت كلام العشگ وما تحچي بس بالاه
معذوره ضاع الوطن اوين الوطن تلگاه
مثل الي دفنت ابن وتون على ذكراه
وتتمنى يرجع بعد وبالحضن تتلگاه
يا روح ما ضل وطن عيشي بلا اوطان
وخلي نشيدج بعد البلبل الفتان
ضاع الوطن من الوطن وما ضل بعد فرسان
ضل بيه قلعة وسجن واطلال من حيطان
وچم نخلة تربي اعلى الدرب اي تمرة ما بيها
تتحسف اعلى الجرى وتتذكر بماضيها
من چان يزهي التمر وفلاحها يداريها
وهسه وصلها السرة وللحطب تاليها
والروح رادت وطن ..منهو الي ينطيها
ما معلمه عالغرب ..بالخير بانيها

والروح بس رادت وطن!!!!!!!!!!!!

[magic_blue]

لبينه دعوتك ياموطن الاحرار
من صحت بعالي صوتك الثار يهل الثار
لبينه دعوتك ياموطن الكرار
واجيناهم زلم تمسحلك العار
اجيناهم وبدينه تذكار للعشرين
ومن هاج عليهم شعلان ورد الاعتبار
اجينه انضّف الوطن من جدم الانكاس
واجينه نثور على امريكا اللبستنه العار
واجينه وحاملين راية ابو الحسنين‏
ونقتدي بعمل عباس من طاح اخوه المغوار
احنه اهلا لها واحني النجيب الثار
من عدو نكس بيوت الله الاطهار
نثور ونخلي دمهه فوك الاركاب
ونعلم عدونه درس من ايدين الثوار
نثور ونكلبه قيامه ونعلن التجوال
على كل امريكي اجه لأرض علي الكرار
على كل امريكي اجه لارض علي الكرار

[الشاعر هادي البديري]

عراقي انه

عراقي انه عراقي وغيرتي الطوفان ---وماتوكف ابصدري اجبال من اشتد

عراقي وغيرتي من الجدم حد الراس --- اتنومس واكولا ابد ما ارتد

اتنومس وكولا هله بكل الموت --- مارد الغرفتي وبمخاده اتوسد

اني ادري المنيه امسجله اعله الناس --- ومن توصل لهلهه الباب ماينسد

عليش انه اخاف وارتجف ساعات --- وبكل ساعه حسين ابكاعي متمدد

كل ساعه حسين مكطع ومذبوح --- لو كومت لحم ماتعرف اتحدد

ماتعرف رحيم المات لو سلمان --- لان مثرم لحم بس اكعد وشدد

لاكني اكولا وي الف ياحيف --- اني انذبح وانت ابقاطك اجدد

الف هنيال امك سوتك مسؤل --- مو صوجك يغاتي دنيتي اتربد

مو صوجك يغاتي مبري من كل صوج --- يهدان الولايه يكوم ويهدد

يهدان الولايه الجان نكنس بيه --- على اشيوخ القبيله ايكوم ويعربد

ولو راح ابسفرته ما نشدنه اعليه ---وبحساب الزلم لا والله ماينعد

ما واحد ندهله وكال هاي اشبيك --- تفلاتك ترد يمخبل عل الخد

شبيك اسودنت يل دينك الاسلام --- والله الكال باب الرحمه مابيه حد


مع تحيات اخوكم الشاعر هادي تكليف البديري

[ابو اماني كريم الحجامي]

السلام عليكم

تحيه طيبه لكل الاخوه

قصيدتي بعنوان

*****
على ظهور المنايا نجيب جتالك


دگوم اگعد دخيلك گلي شمالك

ادري جروح البظهرك ..اجتك والله من فالك

جيرانك عليك اليوم متفقين.. تريد اتگطع اوصالك

بس انته الوگفت بشدة الجيران.. ولا بيهم شريف اليوم يبرالك

جاوينه الاكل خبزك وينه اللي ربه بجاللك

وين الصاح بالكلفات ..بس يتفرج گبالك

جاوين الحلو گ مخيطات اليوم.. لمن كتلوا اطفالك

طريح الگاع وتعالج.... شو محد تدنالك

حسافه الوطن من ينباع ..وحسافه ميتمه عيالك

بس منجوز لا والله... التريده يصير يجرالك

بعد بينه نبض ونزيح كل الغيم ..حتى ينور هلالك

بكثر ما باگو الخيرات.. نرده بجبل مثقالك

ونرده من جديده الثوره العشرين.. وبزود الشريف البقه من رجالك

يرد هاذا الوطن لاهل الوطن والله.. وترد الگهوه لدلالك

نطم عين الشمس احنه العراقيين ..ونطم عين الذي يلعب على اجيالك

اسياد ونظل وما نطخ االراس.. وعلى ظهور المنايا نجيب جتالك

http://bagdady.org/up/uploads/e25ef678e1.gif

[الشاعر حسين المالكي]

السلام عليكم حبيت اشاركم بقيدتي المتواضعة
تفضلو

" مشتاك ياعراق "



يخيرونــــي علـه حـــــب الكــــون
وعلى حبـك ابــيـعك كـوة يــردوني
ولك انــــــت النـبـض بــ الـــــروح
وشرايني التســــــــــــري بضنوني
على حزنك على قهرك على فركاك
تحـير العـيـن تبـجي بدمـعة عيوني
متانين الفــــــرج نرجعلك ازحـوف
واغرف مـــن تـرابك واخـبط بلوني
لان كاعـــك دوه لجروح لمصابــين
تـــرد الــروح والله تـرابــة سئلوني
ترة بعـدك عليـه زيدنـــــي بجروح
وفــركتـك والله ذلـــة وبيهة ذلــوني
افــــديـلك عمر يــــاوطـــن مـنــذور
وابيعن روحــــي لجلك والله بيعوني
بس جدم انة واكف صـــدك اكبــالك
لان صوت الفرح من عندة حرموني
وتعبنة من الهجر والحــزن مل منة
ويـــاصبر اليــــداوي الجرح دلـوني
اتمنـــــــة مثــــل هليـوم انــة هنـاك
وعلى ضفاف النهر يم دجلة ودوني
وشايف مــن تطيح بكَاعك شمحلاك
تضل طايــــــح تكلــهم لاتـــشيلوني
ومــــــاضنــه حلم ويــــداور الأفكـار
لان هذا الحلم مـــن عنــدة كـعدوني
وذا اصبح حلم وانـــــة لمصدك بي
لحــد لايمســني وبـ الــــحلم خـلوني





تحياتي شاعركم الصغير
حسين المالكي

[مشتاق السامرائي]

السلام عليكم ورحمه الله وبركاته



قصيدتي بعنوان


الله اكبر يا بلدي

........................................


الله اكبر ليش هذا الصار

على بلدنا وشعبنا الفارس المغوار

يا بلدي يا ابو الحظارات

يلي تاريخك عله بيه الدار

اه يا وطني يا ابو الامجاد

يالي صوتك هز كل دول الجار

وسفه على جيرانك باعوك

لى اجنبي حاقد وغدار

الله على الخائن الله

باعو بلدهم بدرهم ودينار

لي بعت البلد

هم يجي يوم تنباع

الله كريم يا عراق الغالي

لى صوتك نبع المحبه الصافي


الله اكبر ليش هذا الصار

على بلدنا وشعبناا الفارس المغوار

تحياتي

مشتاق السامرائي

ودمتم للنظال

[خالد الفراتي]

السلام عليكم...( قصيـــــــــــدة)(أرموش شمــــــــــــــــعة)
ــــــــــــــــــــــــــــــــــــــــــــــــــ ــــــــــــــــــــــــــــــــــ
ياكحل عين القصايد...يامفاتيح الكلام
ياغصن زيتون مايل...لونك الابيض حمام.
.ياعـــــــــــراق الدول ناسك؟ وانته للبلدان امام
نزل وحي الشعر بارضك..لبسك باج السلام.
..
بصورتك رسموا ..حضارة ونقشوا احروف الكتابة
وعودك الريان زاهي...باقي للحين بشبابة
..
وجان يطشر موسيقى لكل عتابة
والشمس والكون كلة..يكلة يابة؟
ومايخضــــــــــــر صوت شاعر..الا يسكيه بشرابه
وماتنام الشفة واجدامك ربابة..
ولاكو غير اجفوفك ادك اعلة بابة...؟؟
الشعر سماك شمسة وبعدك انتة الكل سحابة
..
وفرشت الجلمة جفنها.. ورخت المرسة سفنها..
ولبست الدنيا عرسها..
بغيـــــــــــــــــــــــــــر حضنك ماتنام..؟؟
..
وياحرامات البخت يمك وضاع..ولبسوك اسنين غيرك بالوداع..
وربطوا جفوفك بقالب من صراع..!
والصراع بحور من دم.؟
مانشف جاريه يوم.
.والسمة الجرحوها غفلة..من جرحها اتصب نجوم..
رسموا اعلة الشفة..كلمة يالله كوم..
ومن ..يكــــــــــــــــــــــــوم؟؟
بابل الذبحوها للسرفة نذر.
.لو جناينها الخطية الضلت ابليه ستـــــــــــر..
لو السياب وبويب..العلنوا اعليهم حظر؟
والفتاوي بكل مجان..والبيانات اشكثــــــــــــر
..لايطب جمهورة يسمع..هذا شاعرهم خطر
..
ولبسوك ارموش شمعة..ذابت باول دمع
وانتة قيس اشلون ترهم..نار وجدورة شمع والضلع..
دورة دفاع..وانتة كلب بلاضلع
,,
وقطعة قطعة اتحولت كل الخريطة..
وكتبوا اعل الباب...باب!!
وعلكوا قطعة جبيرة.. بيه صورة طفلة تلعب..
وحاضنة بجفها تراب..؟؟
والتراب بنصة دمعة..
..اتخضـــــــــــــــــــر بكل طيحة شاب..!
والحسين بلا حزب ماعندة كتلة..
واليئدونة..يتامة..خافوا من الانتخاب..
سجة الصندوك كلفة..خطر درب الاقتراع.
.لوتمد ايدك تصوت..مايرد منك ذراع..
ولذلك قرراوا..ذولة اليتامة..
وحاربوا صاروا قضية
..
عشرة منهم للهوية....
...ومنهم اتلاثين صاروا بندقية..
وراحوا يصوتون لحسين البقية..؟
والوطن وحسين واحد.
.وانة شفت احسين يكبر بالوطن.
.وانة وامي شفنة صوت اسكينة يتعطر..شجن..
وانة وحدي النوب شفت ام الحســـــــــــــــن
لابسة الليل وسوادة.
.منكبة بثوب الشهادة..
ترتل بلحظة عبادة...!!
ربـــــــــي هذا الدم لمن..
ربي هذا الدم لمن ؟؟