الاطفال ومشاعرهم نحو العراق

[memo_aliraqia]

هلو اخواني هلو اخواتي
اليوم قررت اكتب موضوع بس ممتأكده اذا كان مقرر او لم يكن المهم احب تشاركوني ارائكم به واتمنى تندمجون ويه الموضوع
اني عندي اندماج شديد ويه الاطفال واحب اخذ ارائهم بكل شي
واحب اسأل كل طفل اشوفه يحب وطنه لو لا لان اعتبر الاطفال هم الي راح يعيدون بناء الوطن صحيح احنه النه دور بس دور الاطفال اكبر من دورنا لان هم الي راح يخلوه يزدهر وهم وراح يكونون الازهار الي راح تضفي جمالها على الوطن
سألت بنت اقاربي عمرها حوالي 6-7 سنوات كتلها ليش لابسه الخارطه ليش متلبسين غير كلاده ؟؟؟
كالت : هاي احلى كلاده عندي كتلها : ليش ؟؟؟ كالت : لان بيها العلم !!!
كتلها : انتي تحبين العراق كالت : منو ميحبه ؟؟؟ بعدين سكتت وكلتلي : بس اني اسمع بابا يكول اكو هوايه يكرهون بغداد صدك لو جذب
ظليت ساكته اني
كالت اريد ارجع بس مو هسه من الشرطه تلزم الحراميه
ظليت ساكته حتى لا اطلعها خارج الموضوع
بدت تحجيلي على خوفها من تكون ويه صديقاتها بالحديقه ديلعبون وتصير طلقات او يصير انفجار تكول : اني رأساً اروح على ماما اني اخاف من الطلقات واخاف من الظلمه لان الظلمه متخليج تشوفين الحرامي من يدخل للبيت
هل مريت او مريتي بهيج موقف وهو انه يسالك طفل ومتعرف شنو تجاوبه ؟؟؟؟
هذوله هم الاطفال
ينطوك لمحة عن الحقيقه !!!
بس احنه مندير الهم بال ونكول اطفال ميفهمون شي
لا بالعكس لازم نحط عقلنه ويه عقل الاطفال ونشو بشنو يفكرون
بعدين سألت اختي :
كتلها لانا تحبين بغداد : كالت اروحلها فدوه
شوفوا هاي الكلمة شكد عفويه
بعدين كتلها شنو تريدين تسويه اول منرجع ؟؟؟؟
كالت اهم شي اروح لمدرستي واشوف معلماتي واشوف صديقاتي وحتى لو يكتلوني وراها بس المهم ارتاح واشوف مدرستي

اتمنى يكون عجبكم الموضوع وانتظر ردودكم على هذا الاسئله
1)هل مريت بموقف محرج مع اي طفل سألك سؤال (ضمن موضوع الغربه او الحرب )
2)ماذا اجبته
3)وماذا تتمنى ان تفعل الان لحل مشكلة وطنك
4)وماذا تتمنى ان يكون طفلك في المستقبل

[ابن الانبار الوفي]

اهلا وسهلا وكل الهلا ..

مشاعر عفويه وطيبه تحكي مواجع الغربة التي يعاني
منها الكثير من العراقيين سلمهم الله ..الطفل باجوبته دائما يكون عفويا
صادقا لانه لا يعرف الكذب وعلى گولتنه الي بقلبه على لسانه ..

لم امر بهكذا موقف لانني لم اتغرب خارج العراق ولكن قبل كم يوم عندي
ابن اخويه الزغير ابوه جابله علم العراق حتى ايعلگه على البايسكل مالو
فاخذه وبدى يركض ويغني منصوره يا بغداد صراحة هيج المشاعر طفل زغير
عنده هيج مشاعر وحب لبغداد والعراق ولو يمكن احد ايگول هذي من كثر ما يسمعها لكن اقول انو لكل انسان مشاعر واحاسيس وبالاخص تجاه بلده الغالي ..

تمنياتي لك بالتوفيق وان شاء الله يوم ترجعون لبلدكم
وترجعون للناس الي اتحبوهم واصدقاءكم وارضكم الطيبه ..


ابن الانبار الوفي

[Royal Designer]

اهـــــلا وسهــــلا بيــــج
اختــــي الكريمــــة اشكرك على موضوعك الجميل والمؤثر بنفس الوقت واللي يعاني منة كل عراقي مغترب.....
بالنسبة لكلامك الممهد للأسئلة.....بصراحــة الأطفال جميعهم عفويين بأجاباتهم وهم يقولون ما يعتري خبايا مشاعرهم بشكل عفوي ورد سريع وحتى احيانا لا يفكرون بالأجابة ويطلقون عبارات من القلب للسان بشكل مباشــر.....
اما بالنسبة لأسئلتك فأني اختلف بأجاباتي عن غيري من الأعضاء:
1-نعــــم مريت بمواقف كثيرة واني خارج العراق وسألت اكثر من طفل عراقي مغترب....وكانت الأجابة واحدة وهي...ليش احنة خارج بلدنا ومنكدر نرجع..ليش احنة تركنا المدرسة ومنكدر نرجع انداوم..مشتاق لأصدقائي ومشتاق لبيتنة...ليش قتلوا صديقي وشخص من اقربائي..وليش وليش........وتسألات عديدة محرجــة ومفقودة للأجابة....
2-(لا حولة ولا قوة الا بالله العلي العظيم)...اعتقد هذا يكفي ويفي بالغرض...
3-هذا محور الموضوع ....ادعو من الله عز وجل ان تفرج علينة وعلى امة محمد ...
وان شاء الله نرجع للوطن الغالي ويلتئم جرحنا ويلتم شملنا من جديد....لأنه تعبنة من الغربة وملينا ومحتاجين نرجع لأحضان وطنا العزيز....
4-اتمنى ان يكون انسان مثقف ومحترم ويحب وطنه ولا يتعذب ويتغرب في سبيل ظروف وطنه العصيبة....
وشكرااااااااااا اختي العزيزة على هذا الموضوع..
ان شاء الله ما قصرت بأجاباتي..
تقبلي مروري وردي وتحيــــاتي..

[memo_aliraqia]

شكرا اخويه ابن الانبار الوفي وشكرا ميمو على اجابتكم السريعه وتاقلمكم ويه موضوعي وانشاء الله يكون القى اعجابكم

[فراشة العراق]

شكرا على الموضوع

صح هو موضوع مهم

تسلمين والله ينطيج العافية

[عمر الساهر]

موضوع رائع جدا ً ...ينبع من مشاعر صادقة و عفوية ..
تفكير جميل جدا ً ..رغم حزنه ..

بشكل عام الاطفال اللي اعرفهم اسمعهم كلام جميل عن العراق و اغرس بيهم الامل ..
مصادفني مثل موقفج ..

لي عودة طبعا ً ..

و الى الامام دائما ً..

عمر الساهر