دارمي حوار بين ام وبنتها البنت تريد الزواج من رجل ذو مال

[فارس بلا جواد ولكن]

الام:
يمه الاجه ابن جواد موش ابن غربه ... اصله الطبع والخير واصله المحبه

البنت:
اليخطبني لازم كون انه الاريده ... بيت وقصر واموال وسويچه بيده

الام:
بكبرج واجهت خطاب كلتلهم ارضه ... جابولي خام الشام والحجل فضه

البنت :
يمه زمانج راح بيه انظلمتي ... وذاك الوكت مرفوض مو مثل وكتي

الام:
عشنه بوفه وبطيب طول اليالي ... لارزه لاكنتور لامهر غالي

البنت:
اعرف بنات هواي عزن نفسهن ... تكلف الف دينار بدلة عرسهن

الام:
شرايج لون زنكين علحسن حبج ... وملج بعد شهرين وعليه ذبج

البنت:
بنيتچ بعدها اليوم حلوه وزغيره ... مو مشكله من يروح يخطبني غيره

الام:
بس كلمه عندي وياج ولله الشهاده ... باالوفه وبالاخلاص سر السعاده

البنت:
اخر كلامي وياج متطوره انه ... والمايجيب المال شلي بحنانه

الام:
ر وحي الله وياج ياسلوة العين ... امج واعرفج زين باجر تندمين

[عمر أبو فله]

عاشت ايدك وصح لسانك اخويه فارس كلش حلو ..

بس تسمحلي اضيفلك بيتين تابعه لهاي القصه

البنت

انتي زمانچ فات وانه بزماني.....غلطانه وتريدين مثلج اعاني

الام

يبنيتي چان الشوگ مو مثل هسه...غيره وشرف ودموع والملگه خلسه

[عاشق الاصدقاء]

عاشت ايدك على هاي الدارميات الجميله جدا جدا جدا
تسلملي ننتظر منك المزيد يحبي لتنسانه
مع تحياتي الك خيو الورده مو مو مو
اخوك عاشق الاصدقاء