قصيدة " شريد احچي بعد " .. بقلم الشاعر أيسر الأعسم

[الشاعر أيسر الأعسم]

شريد أحچي بعد عگب الجره والصار
ونزلت دمعـة مني انـوب مفضوحة


بچيت بـدم صـدك من شافت العين
بسيـوف الغـدر بغـداد مذبوحة


تفجيـر وقتـل والبيها كومة أيتام
واذا اعـد الأرامـل تنگلب نوحة


خمس سنين أتاني وما صفـة هالحال
شو بس العـراق ظل حاير بروحة


صدك بغداد العروبه تنگلب تكساس !!
وصدك أرض العراق تصير لأفغـاني


وصـدك ماكو حكومة التمحي هالأثار
ونـرد بصوت الك ميصير الك ثاني


ما اصدك يـرد وك بينه هـذا السيل
سيل اسـم العـراق وسيل بغـداني


هم شايف مجوسي يحن لأرض بغـداد ؟؟
كلي شلـون يرد والحكـم طهـراني


مكانك يا وطـن بالسرة الأول چان
وهسه اسمك رجع بوسط السرة الثاني


ما بيـن الخـلاف أبين هـذا وذاك
وبين هـذا الأمريكي وذاكَ الأيـراني


وبين القاعـدة وبين الشريـف الزين
شفت الخـلاف كله بسبـب نفطاني


قـررت الشهـاده وغيرها لا ما اريـد
أحنـه أهل الشهاده وغيـرة مسموحة


وما اريـد الچفـن ابيض بلـون الغيم
جفنـونـي بعلمنه العـاليه وضوحـة


ودك اسـم العـراق بنقش عالتابـوب
او ودوني بوسـط بغـداد شيعـوني


وعلى كل المنـاطق والمـدن والنـاس
وعلى أمـي وأبـوية وخـوتي فروني


بعد ما كلشي يخلص وينتهي التـوديع
لتـراب النجـف لهنـاك نقلـوني


عـذراً ما گـلت بقـوني أهلي هنا
وجـوه ترابهـا لبغـداد خلـوني


لأن كاع النجف جواها ابو الحسنين
وبغيـر تـربة علي لا لا تـدفنوني
...............................
"الشاعـر أيسـر الأعسـم"

[رآفت آلحديثي]

يا أهلا وسهلاً بالاخ أيسر ألاعسم

وحياك الله وشكرآ لك لهذه القصيدة

التي تكلمت بلسان المحب اكيد لبغداد الحبيبة

ولعراقنـــا الغالي ... وان شاء الله كل غيمة مصيرها

تنقشع وتروح وبخير وبهمة اهل العراق

يبقى العراق (( للعراقيين فقط ))

الشهادة غاية كل مسلم

وماكو مقام اجمل واطهر واكرم من جنة الله

وان شاء الله بغداد تبقى رمز للشموخ والصمود

بعون الله سبحانه وتعالى ..

مودتي لك وبارك الله بيك

[ابن الانبار الوفي]

كلام جميل وواقعي
وتجسيد لحالنا وحال مدننا وبغدادنا وعراقنا باجمعه.
صح لسانك وبيض الله وجهك على هذه الابيات الجميله
وما تحمل من معاني ومشاعر العراقي الصادق.

سلامي واحترامي لكَ
دمت بتواصل وتفاعل.

ابن الانبار الوفي

[الشاعر أيسر الأعسم]

شكرا اخواني رأفت و أبن الانبار
على مروركم الجميل
نورتوني

تحياتي

[عاشق الاصدقاء]

عاشتا يدك عيوني
موضوع مميز
عاشق الاصدقاء

[الشاعر أيسر الأعسم]

أيدك العايشة أخوية
شرفتني بردك
تحياتي