تعبير عن الاهتمام والشكر

[طائر تشرين]

بسم الله الرحمن الرحيم
بالبداية احب ان اشكر كل الاشخاص اللي ساعدوني وانطوني حل لمشكلتي (اني الشخص اللي كان محتار ان يصارح البنية اللي معتبرتة هية مثل اخوها )يمكن نسيتوني بس بصراحة انقطعت كل هاهي الفترة لأن طلعت اكمال وحاليا دا اقرة ادعولي انجح اول مرة اطلع اكمال بالجامعة هاي بسبب انه سمحت لنفسي ان احب وهذا اكبر خطأ ما اعتقد اكو حب بزمنا هذا احنا حياتنا واقعية اكثر من ما هية فنطازية واكول فنطازية لأن اغلبنا عايشين وهم الحب متأثرين بمهند ونور او الثانية (سنوات الضياع) واحنة الدنية محتركة عدنا تبتلي على عمرك تحب وحدة من كل قلبك الدنيا والمشاكل والامة تنقلب على راسك تكول ماكو غيرك حب المهم ما اريد اطول عليكم اني سمعت نصيحتكم ورحت حجيت وياها بس هية للأسف رفضت وخسرتها لأن كالتلي انتة خنت الاخوة والصداقة واني اهلي يعرفوك وانتة ميصير اتفكر هيج المهم اني عبالي سويت شغلة تستاهل هذا كلة طلع هية اصلا تحب شخص ومتعلقة بي ... وكالتلي انتة حتى ميصير اتكون اخوية لأن انتة حنت الخوة اللي ابيناتنا وطبعا كبرت الموضع واني والله جنت رايدها زواج وحتى اهلي يعرفون بيها واهلي هم شجعوني وكالولي احجي وياها ...
واحنة وياك المهم صدكوني ما ندمان لأن سمعت كلامكم ورحت كلتلة بالعكس انتو ريحتوني وخلصتوني من عذاب اني في غنى عنا واشكركم والله مقصرتوا وان شاء الله بس انجح واوعدكم انجح بالامتحانات ارجع للمنتدى الحلو الاكثر من رائع وانتو اخوتي وعلى راسي (لتخافون مراح احبكم تبقون اخوتي هههههههههههه)
تقبلوا مروري
مع السلامة

[salahsport_82]

السلام عليكم

أخي الكريم أهلآ بك وبموضوعوك وأحب اجاوبك على نقطه نقطه فيه

أولآ داعيلك من كل قلبي حتى تنجح وأنشالله الي فيه الخير يأتي من رب العالمين



اول مرة اطلع اكمال بالجامعة هاي بسبب انه سمحت لنفسي ان احب وهذا اكبر خطأ


هذا اخويه العزيز أكبر خطأ انك تتهم الحب بمسأله أكمالك وهسه راح أقولك لماذا


ما اعتقد اكو حب بزمنا هذا


أحب أقول أيضآ في هذا الزمن وفي كل زمان يوجد حب بس مسألتك مختلفة لانك لو من البدايه شرحتها بصورة جيده كان جاوبناك بصورة افضل



ومسأله مهند ونور مو هي الي خلقت الحب لا اخي الحب موجود منذ خلق البشر




سمعت نصيحتكم ورحت حجيت وياها بس هية للأسف رفضت وخسرتها لأن كالتلي انتة خنت الاخوة والصداقة واني اهلي يعرفوك وانتة ميصير اتفكر هيج المهم اني عبالي سويت شغلة تستاهل هذا كلة طلع هية اصلا تحب شخص ومتعلقة بي ... وكالتلي انتة حتى ميصير اتكون اخوية لأن انتة حنت الخوة اللي ابيناتنا وطبعا كبرت الموضع واني والله جنت رايدها زواج وحتى اهلي يعرفون بيها واهلي هم شجعوني وكالولي احجي وياها ...
واحنة وياك


شوف يا أخي الغالي الظاهر من كلامك أنك ما سألت لو كانت هي تحب شخص أخر او لا ؟

والأمر الاخر أنها ردتها فعلها كانت أكبر بكثير من المتوقع وأنت ما قلت شي غلط الا أنك بينت ألها حبك والحمد لله على صراحتك وأنت أبدآ ما خنت الاخوه هذا الشي جدآ غلط منها

بس كان الافضل أنك تسأل عنها لو كانت تحب شخص أخر او لا

وبعدين تشوف لو كانت هي معجبه بيك او لا

الظاهر انت أتسرعت هواي بأعترافك ألها

المهم مصار شي ولو هي ردت فعلها كانت كبيره

الله كريم الله يعوض وانت مو أول واحد تصير هاي الحاله فيه

وانشالله ناجح تطلع بالامتحان وترفع الراس أخوي العزيز

تحياتي واحترامي ألك بس والله الدنيا كلها متسوى الواحد يزعل بيها لحظة أنشالله تتعوض بالي تكدر تسعدك وتحبك وتراعيك

[sura]

السلام عليكم ورحمة الله وبركاته

اخي العزيز عندما قرأت قصتك تفاجئت من ردت فعل الفتاة التي تحبها !!!!!!!!!!
كيف طاوعها قلبها ان ترد عليك بهذا الاسلوب القاسي والجارح .نعم كثير من النساء انا وغيري صارحنا
رجال بحبهم ولم نكن نبادلهم المشاعر(حب من طرف واحد)ولكن لم تكن ردة فعلنا بهذا الاسلوب؟

على الاقل كان لها ان تقول لك هذه الجملة فقط وبحياء(انت كأخ لي وستبقى اخ )بدل من تجريحك بهذه الطريقة

اعذرني اخي اذا قلت لك هذه المراة لاتستحق حبك فهي (لم تحمل ولو القليل من المشاعر والاحاسيس )لترد عليك بأسلوب راقي

بالعكس انت لم ترتكب خطأ بمصارحتك اياها لعل ما فعلت قد يكون سبب صنعه القدر لتكتشف ان هذه المراة لا تستحقك

هذا رأي الشخصي بالموضوع

تمنياتي لك بالنجاح في الامتحانات والموفقية في ايجاد المراة التي تستحق فعلا حبك

تحيتي لك

[! Toota !]

سمحت لنفسي ان احب وهذا اكبر خطأ ما اعتقد اكو حب بزمنا

اي كلامك صح
بس ياربي يعوض عليك بكل خير
اكو حب بس قليل بزماننا

بعدين ترة برأيي هذا رد فعل طبيعي منها لان تفاجأت !!

ياربي ادعيلك ورح ادعيلك من اصلي ياربي تنجح
وربي يوفقك

.................................................. .....................................

واريد اكَول لصلاح:-

اكيد اذا كان هناك صداقة بين طرفين وانتهت بحب
فهذا اكيد كلامها صح هي خيانة للصداقة !!

يعني مستحيل ترجع الصداقة من جديد!!


تحياتي للجميع

[عيون حائرة]

طبعاااااا هذا شي طبيعي اتكون ردة فعلها بهذي الطريقة لان يمكن لان عدها علاقة مع ثاني
لاكن حتى لو كانت تحب غير شخص ميصير ترد عليك بهذي الطريقة المؤلمة جان على الاقل
حسبت حساب الصداقة الي كانت جامعتكم ومجرحت مشاعرك بردها الغير اللائق

المهم طائر لتاالم ولاتحزن وصدكني اني وياك مااعتقد اكو حب بهذا الزمن وحتى لو اكو يمكن بنسبة قليله جداااااااا والاهم من هذا كوله انته اتخلصت من شي كان عبئه ثقيل جدا عليك


وانشالله ياربي الله ايعوضك باحسن من عدها والي اتكون سعيد وياها وتستحق هذي المشاعر الصادقة

[salahsport_82]

واريد اكَول لصلاح:-

اكيد اذا كان هناك صداقة بين طرفين وانتهت بحب
فهذا اكيد كلامها صح هي خيانة للصداقة !!

يعني مستحيل ترجع الصداقة من جديد!!

توته الغاليه

ألكثير من الصداقات أنتهت بالحب شنو ذنبه أذا أتطورت العلاقه وحس بأنه يحب البنيه شلون يبقى ساكت و يبقى في العذاب

وهذا بالعكس مو خيانه للصداقه يجوز يتفاهمون على شي أكبر من الصداقه والحب

[طائر تشرين]

بسم الله الرحمن الرحيم
طبعا اشكر الاخ صلاح والاخت توتة والاخت سرى والعيون الحائرة على اهتمامهم بموضوعي واني اسف دوختكم وياية وكلكم حجيكم صح واني ان شاء الله راح انجح بالامتحانات لأن وعدت نفسي ووعدتكم وان شاء الله اتخرج هاي اخر سنة واشوف حياتي بس صدكوني اتعلمت من هاي التجربة هواية اشياء ويمكن اني فعلا خنت الصداقة وسمحت لنفسي انه امشي ورة قلبي وميصير هذا الشي بس الحمد لله وكعت واكف مثل ميكولون يعني صح اتأذيت لأن خسرت حتى صداقتها بعد ان كانت مالية حياتي بس الله كريم والدنيا منتهت وبس حبيت اكول لصلاح اخوية انه اكو هواية اشياء الواحد لازم ينقهر عليهة بهاي الدنيا صدكني يعني هاي خسارتي الها راح تبقى تدك بقلبي الى ان اموت بس اوعدك اشوف حياتي واعيش وانجح واتعين واادي رسالتي اللي الله كلفني بيهة وشكرا الكم كلكم ولهذا المنتدى الوردة تحياتي

[*يـــاقـــوتـــه*]

السلام عليكم ورحمة الله وبركاته
اهلا بك اخي الكريم ويارب نسمع الاخبار الحلوه بنجاحك يارب
وانت فعلا زين ماسويت من رحت وتكلمت وياها
حتى ترتاح من عذاب فعلا انت في غنى عنه

اما اعلق على كلامك ان ماكو حب بزمنا
فعلا اخي ماكو شي حب بس اكو شي اسمه نزوات
ولاافصل الفتاة عن الفتى لان هذا زمن الامور الماديه
والحب شي اكبر واسمى من هذا الي يفكرون بي

وبالنسبه للصداقه مستحيل تتحول حب يمكن هذا ووارد
لكن مستحيل يكون وجود حب ويتحول لصداقه
لا لان راح يكون جرح

على العموم شكرا لك اخي وتقبل مني المرور

[طفولة بريئة]

عمره ماكان الحب عيب

وكثير مرات الصداقة تتحول الى حب

بس عتبي على ردة فعله

هي اذا كانت صدك تعزك تتقبل الموضوع وتكلك من غير ان تجرحك

بس صدكني اني على ثقة هي راح ترجع وتعتذر الك اذا كانت تعتبرك شخص غالي عده

والله يوفقك

مودتي

[طائر تشرين]

مشكورين يا ورود على اهتمامكم وان شاء الله افرحكم بنجاحي اخوتي