الغربه

[حيدر العبيدي]

كما وعدناكم ان نكتب كل جديد ها انا اضع بين يديكم قصيدة الغربه ارجو ان تنال اعجابكم مع حبي وامتناني لكم
الشاعر الشعبي
حيدر العبيدي



هله... أنسافر تكلي وننسئ مافات
وتتصور الغربه هواي .......سهله
الوطن (قبله)وعليهه أنصلي كل يوم
أشلون أتريد اصلي بغير ...قبله
شسوي هناك كلي أبوكت الغروب
والينشدني وين أهلك ....شكله
وشصبر ياجدم لو..مر..علي ليل
وتهزني الذكرئ لدروب .....المحله
وذا..رف جفني مره ..أوراد.... بغداد
هناك بيا(نخل) زايف ....أكحله
وذا..حن كلبي يوم أيزور (الحسين)
هناك منين أجيب حسين ....مثله...!!!!
وصوت (أمي)الحنين التارس البيت
أمله..... أشلون وأنته أتكلي ....مله
نار الغربه وأحنه أكلوبنه أشموع
وذله...وداعتك صدكني .....ذله
هناك...بغربتك ياهو...اليحس بيك
وياهو..الينكسر كلبه...... وتكله
عذب صح(الفرات)..أوكوثري الماي
لكن ...مر..يصير أبغير ....دجله...!!!
نعم عندي أمنيات وصارن أهواي
وأكظي الليل بألاحلام ....كله
ونعم (عاشك) وخمس أسنين أحب صار
وكلب محبوبتي كل يوم ....أأمله
ونعم غالي الوكت مابيه أجاريه
لكن عزتي ياصاحبي .....أغله
ألغنه يعني النفس مو كثرة المال
البشر بفعاله وي الناس ....يغله
وأموت أبشرف يم أبيوتنه(الطين)
اولا....أعيش ابوسط (جنه).....أبمذله...!!!!
وانته أتكلي سافر عيش دنياك
عندك ...أمل..وأنه العندي ..عله
الوطن والناس وأهلي وهاي الوجوه
ثكيل أفراكهم...مابيه ...أحمله
أنه ..أوياك أسافر لكن أبراي
اله...أوياي أشيل (الوطن).....كله

[عاشق الاصدقاء]

هالله هالله عاشت ايدك خيو كلمات جميله والله
تسلملي وبارك الله بيك
ننتظر منك المزيد
مع اطيب وارق التحيات
اخوك
عاشق الاصدقاء

[حيدر العبيدي]

رد للشاعر الشعبي حيدر العبيدي
مشط امك لكيتة ابساحة التحرير
من كثرة مشطة اتكسر اسنونا
مشط امك خشب مو على الموديل
لان امك اصيلة ربتك شاعر

اخوك الشاعر
ابو غزوان(الحويجة)

[نور البدر]

الله الله
ياشاعر الكلمة الجميله
والمفرده الرائعة
والله ما أدري شكول
بس هاي الكلمات تذكرني بشهيد الكلمة والموقف الشاعر الكبير (( الشاعر رحيم المالكي ))رحمه الله
ليش الوحدك من غير جناز
وياهو يغسلك ويغمض العيون
من وحشة الغربه لوحشة الموت
وشربت الوحشتين بفرد ماعون
وتقبل مروري ونحن بأنتظار المزيد

[حيدر العبيدي]

الى الاخ نوري
اشكركم لتعاونكم معنا ولكن هذه الكتابه لم تحذف ارجو حذفها مع الحب والتقدير
الشاعر الشعبي
حيدر العبيدي